पूर्वी पालक आपल्या मुलांसाठी जमीन, शेती, घर, सोने किंवा व्यवसाय ठेवून जात असत. त्या काळात हीच सुरक्षिततेची हमी होती. पण त्याचबरोबर ते मुलांना जीवनाचे धडेही देत असत. संध्याकाळी घरात सगळे एकत्र बसत, अनुभव सांगितले जात, चुका समजावून सांगितल्या जात आणि पुढच्या पिढीला जगण्याची दिशा दिली जात असे. आज जग बदलले आहे. आज नोकऱ्या बदलत आहेत, उद्योग बदलत आहेत, तंत्रज्ञान झपाट्याने बदलत आहे. अशा काळात केवळ संपत्तीचा वारसा पुरेसा राहिलेला नाही. आज सर्वात मोठा वारसा म्हणजे ज्ञान, कौशल्य, मूल्ये, अनुभव आणि योग्य मार्गदर्शन. दुर्दैवाने, आपण संपत्ती वाढवण्यात यशस्वी झालो; पण संवाद जपण्यात अपयशी ठरलो. आज अनेक घरांमध्ये प्रत्येकाच्या हातात मोबाईल आहे, पण एकमेकांसाठी वेळ नाही. एकाच छताखाली राहूनही मनांमध्ये अंतर वाढत आहे. जेवणाच्या टेबलावर गप्पा नाहीत, आजी-आजोबांच्या गोष्टी नाहीत, आई-वडिलांशी मनमोकळा संवाद नाही. माहिती भरपूर आहे, पण मार्गदर्शनाचा अभाव आहे. याचाच परिणाम म्हणून आजची अनेक मुले बुद्धिमान असूनही लाजाळू, संकोची आणि स्वतःचे विचार मांडण्यास घाबरणारी दिसतात. त...